Koob Tsheej July 4 Tseemceeb, Hmoob Xav Kom Ua 3 Hnub
(July 4 celebration is an important event, Hmong want it to be a 3 days event)

Tus sau: Ntxoov Lauj Vaaj

Txhia txhia xyoo Hmoob nyob lwm lub tebchaws thiab nyob Amelikas kub siab lug tuaj koom peb Hmoob Minnesota lub koobtsheej July 4 yam zoo siab hlo luag ntxhwb ntxhi txhia tus. Lub koom haum Hmoob, Lao Family Inc., yog lub uas tsa lub koobtsheej no txhia xyoo.
 
Xyoo no, thaum lub 7 Hli 4-5, 2009, muaj Hmoob kwv yees 50,000 rau 60,000 leej tau tuaj koom peb Hmoob lub koobtsheej July 4 uas hu ua Hmong Freedom Celebration & 29th Annual International Sports Tournament. Xyoo no, muaj Hmoob tuaj Canada, Australia, Fabkis, Lostsuas, Guyenne, thiab lwm lub tebchaws tuaj koom tibsi.

Hnub July 4th, Hmoob tus thawjcoj Nais Phoos Vaj Pov nrog nws pojniam thiab cov nomtswv tseemceeb nyob Minnesota thiab lwm tebchaws tuaj qhib lub koobtsheej thiab koom lub koobtsheej. Nais Phoos Vaj Pov thiab cov nomtswv coob leej kuv los hais lus rau ib tsoom Hmoob sawvdaws thiab qhuas txog lub koobtsheej.

“Tau 64 xyoos uas kuv tau pab peb Hmoob. Tam sim no kuv pom peb Hmoob nce ib theem lawm. Thov kom sawvdaws sib koom siab, txhim kho, sib nqa, sib zam txim, thiab sib koomtes Hmoob thiaj yuav vammeej mus rau yav tom ntej,” Yawg Hlob Nais Phoos Vaj Pov cov lus uas nws hais txhawb peb Hmoob hnub July 4th.

Xyoo no muaj kislas (sports) ntau hom tuaj koom kev sibtw. Cov txivneej ncaws pob muaj 36 pab, cov pojniam ncaws pob muaj 8 pab, cov txivneej Flag Football 28 pab, pojniam Flag Football 6 pab, cov ntaus tujlub 16 pab, thiab tseem muaj ntau yam kislas ntxiv thiab.

Kev lagluam muag khoom kuj tseem muaj coob thiab ntau yam kawg li thiab. Hmoob nyob Amelikas thiab lwm tebchaws kuj tuaj muag khoomnoj, khaub ncaws, nkauj, movies, tshuaj, khoom menyuam yaus, thiab lwm yam. Pom tau tias Hmoob kuj vammeej ib theem lawm, thiab tej khoomnoj kuj ua tau qab kawg li.

Sawvdaws hais tias lub koobtsheej xyoo no kuj ua tau zoo kawg lawm, xws li nres tsheb dawb (free parking), tsheb buses thauj thiab xa sawvdaws mus dawb los dawb, nqi qhovrooj los sau ib tug $4 xwb, tej tsev plob los zoo lawm ntau, thiab tej khibnyawb (garbage) los du dais lawm ntau.

Koobtsheej July 4 tseemceeb li cas rau peb Hmoob thiab dab tsi uas yuav tau txhim kho kom zoo ntxiv? No yog ob nqi lus uas kuv nug cov muag khoom thiab cov tuaj koom. Suab feem coob teb tias koobtsheej July 4 tseemceeb rau peb Hmoob heev vim nws yog lub chaw rau peb Hmoob nyob txhia lub tebchaws tuaj sib ntsib thiab ua lagluam.

Hais txog kev txhim kho kom zoo ntxiv, muaj 90% pom zoo kom muab lub koobtsheej July 4 ua 3 hnub yog hais tias July 4th poob ncaj rau long weekend. Yog hais tias July 4th hnub so haujlwm yog Friday, ces muab lub koobtsheej pib hnub Friday txog Sunday. Yog tias hnub so haujlwm poob rau Monday, ces muab lub koobtsheej pib hnub Saturday txog Monday.

Sawvdaws hais tias vim koobtsheej July 4 yog ib lub koobtsheej uas tseemceeb thiab loj rau peb Hmoob nyob Amelikas thiab lwm tebchaws tuaj koom tibsi. Yog tias ua 2 hnub xwb nws tsis tsim nyog rau sawvdaws cov uas tuaj deb tuaj, tsis muaj sijhawm txaus rau cov ua lagluam, tsis muaj sijhawm txaus ncaws pob final, thiab tsis muaj sijhawm txaus rau ib tsoom kwvtij neej tsa phoojywg uas sib ncaim ntev ntev mam sib ntsib ib zaug.

Muaj 40% pom zoo kom muab cov muag khoom faib nyias nyob nyias raws section li uas muag khoomnoj kom yoojyim rau cov ncig yuav khoom, tabsis 60% tsis pom zoo faib vim lawv pom tias ua li ntawd ces cov music yuav nrov heev dhau thiab ib txhia khoom yuav tsis poob vim yuav tsis muaj neeg ncig mus txog.

Muaj 30% hais tias cov suab music kuj tseem nrov heev ua rau kev hais lus tsis hnov zoo, tabsis 70% hais tias nrov haum lawm, vim sawvdaws kuj xav hnov lub suab kom meej lawv thiaj xav yuav.

Khibnyawb (garbage), yeej zoo lawm ntau, tabsis muaj ib txhia xav kom tshaj tawm hauv paj taub hais kom sawvdaws muab kev koom tes, pab muab pov rau hauv cov thoob khibnyawb kom nws haj yam zoo ntxiv.

Cov tsev plob (restrooms) nws kuj muaj txaus siv lawm thiab, tabsis muaj 2 yam uas ib txhia xav kom kho ntxiv yog muab cov tsev plob faib ib ya rau pojniam thiab ib ya rau txivneej. Vim muaj ib txhia txivneej tsis siv txivneej qhov chaw tso zis, nws cia li tso rau qhov chaw zaum (toilet) ces lo lo zis, ua rau cov pojniam tsis zoo siv.

Muaj ib txhia tau hais tias muaj qee pab kislas muaj lwm yam neeg uas loj cood dua, ces nws ua rau peb cov Hmoob ncaws tsis tau vim peb yog tibneeg me. Lawv xav kom nrhiav hauv kev los kho kom nws fair rau cov uas me thiab, lawv thiaj xav tuaj ncaws ntxiv rau yav tom ntej.

Ib qho, raws li kuv xav thiab yog ua tau, xav kom nyob ntawm qhov rooj nkag, muaj ib daim sign loj qhia tias nyob qhov twg ua dab tsi, kom sawvdaws paub mus saib thiab nrhiav yam uas nws nyaim.

Kuv tau hu xovtooj nrog Thawjtswj (President) Nkaj Huas Yaj tham thiab nug txog cov nqi lus saum no saib nws xav li cas. Nws teb hais tias qhov uas muab lub koobtsheej ua 3 hnub, yuav npaj ua kom muaj 3 hnub rau yav tom ntej ib hnub twg. Ob yam uas yuav tau ua, xws li thov kev pom zoo ntawm city – nws xav tias city yuav ok thiab yuav xav saib yuav ua li cas thiaj yuav tau nyiaj los txaus them tej nqi, xws li tub ceevxwm, khibnyawb, thiab lwm yam.

Hais txog kislas, Thawjtswj Nkaj Huas hais tias lawv yeej pom thiab sibtham nrhiav hauv kev los ua kom fair rau sawvdaws lawm. Qhov uas yuav tsis txais lwm yam neeg mas yuav ua tsis tau. Vim yog tsis txais ces luag yuav hais tias peb xaiv tibneeg lawm ces tsis zoo nkauj. Npaj tias yav tom ntej, yuav npaj muab faib ua 2 pab ncaws, cov loj ncaws nrog cov loj thiab cov me ncaws nrog cov me.

Yav tom ntej mam npaj saib puas muaj ib cov ntawv faib losyog ib daim board nyob ntawm cov qhov rooj qhia txog cov txheejtxheem nyob hauv lub koobtsheej, kom sawvdaws paub mus saib yam uas nws xav saib nyob qhov twg rau qhov twg.

Hais txog tsev plob, Thawjtswj Nkaj Huas Yaj hais tias lawv mam hais saib cov tswv tsev plob puas kam muab faib ib ya rau pojniam, ib ya rau txivneej, thiab lo ntawv rau. Raws li kev coglus mas ib hnub lawv yuavtsum los tu 3 zaug thiab muab ntawv rau, tabsis tej zaum lawv kuj los tsi yeej los muaj.

Hais txog khibnyawb thiab suab music, yeej tshaj tawm hauv xovtooj cua rau sawvdaws kom muab kev koomtes lawm, tabsis ib txhia kuj tsis hnov ces kuj tseem uas tsis tau los muaj. Tabsis ua tsaug uas feem coob kuj muab kev koomtes lawm, vim khibnyawb los yeej tsawg lawm thiab suab music los kuj tsis nrov heev lawm.

Thawjtswj Nkaj Huas Yaj thov zoo siab ua tsaug rau txiv Nais Phoos Vaj Pov, cov nomtswv nroog, cov nomtswv Lostsuas, cov nomtswv tuaj txawv tebchaws tuaj, ib tsoom nomtswv Hmoob, cov tswv lagluam, cov kislas txhua phab, thiab ib tsoom Hmoob sawvdaws uas nej tau tuaj txhawb thiab koom peb Hmoob lub koobtsheej July 4 tiav dhau mus rau qhov zoo nkauj lawm.

Kuv tus kheej thov qhuas cov tub leg haujlwm hauv Lao Family Inc. uas nej tau siv zog ua lub koobtsheej July 4 rau peb Hmoob tuaj qhov txhia chaw tuaj sib ntsib sib pom ib xyoos uas tiav tau zoo nkauj kawg lawm. Thov kom Vajtswv tsom kwm saib xyuas Lao Family Inc. thiab nej sawvdaws kom ntsib kev nyob zoo thiab ua tau haujlwm zoo pab peb Hmoob mus rau yav tom ntej.

Kuv zoo siab kawg uas pom peb Hmoob thaum July 4 tuaj coob coob sib hlub ua ib pab. Kuv thov kom peb nco ntsoov lo lus tias, “ Ua ib pab peb sawv, sib faib peb vau – Unite we stand, divide we fall”.